MC (Musik)

De MC is afkört vun dat Engelsche Master of Ceremonies. Dor is en Minsch mit meent, de as en Moderator dör en Bühnenshow oder dör en Performance dör föhren deit. In'n Düütschen bruukt een an dor un for sik dat franzöösche Woort Conférencier för. Dat engelsche Master of Ceremonies warrt an sik bruukt för den Zeremonienmeester, de in de Gottsdeensten vun de Röömsch-kathoolsche Kark en Rull speelt.

In Düütschland warrt MC tomeist as en Titel för Rappers bruukt. „MCing“ is en vun de veer wichtigsten Delen vun de Hip-Hop-Kultur. Man ok bi de Drum'n'Bass-Musik gifft dat MCs, man dor speelt se nich so'n grote Rull, as bi den Hip Hop.

MCs sünd in de USA an't Enn vun de 1960er un an'n Anfang vun de 1970er Johren bi de DJs mit bi ween. Jem ehr Upgaav weer, datt se den DJ un sik süms vörstellen döen (dat wurr „shouting out“ nömmt), datt se de Lüde to'n Danzen upfoddern döen, Jokus maakden, de Besökers begröten döen un de Fier in Gang bröchen. De weeren so wat, as Animateuren.

De eerste MC in Düütschland weer de Rapper Torch, de in de 1980er Johren in Heidelbarg mit dat Rappen anfungen hett.

In de USA hett sik de Begreep in de 1970er un 1980er Johren binnen de Hip-Hop-Szeen dörsett. Hen un wenn warrt ok seggt, MC bedüüd Microphone Checker oder ok Microphone Celebrator, man düsse Bedüden sünd eerst achternoh ut de Bookstaven MC utspunnen wurrn (Backronym). Just up düsse Aart hett de Rapper Rakim in dat Johr 1987 meent, MC scholl Move the Crowd bedüden (up Platt: Süh to, dat de Lüde den Moors hoochkriegt). Dat stimmt avers, dat de Upgaav vun en MC just dat is, dat he tosütt, dat de Lüde den Moors hoochkriegt. In de Szeen warrt meist MC seggt un nich Master of Ceremonies.